சி.ஆரோக்கியசாமி எழுதிய கடவுளை கேள்விக்குள்ளாக்கும் மொழி என்ற நூலானது கடவுள்,மதங்கள் அவற்றின் தோற்றம் பரிணாம வளர்ச்சி அழிந்து போன மதங்கள் என்பவனவற்றைப் பற்றிப் பேசுகிறது.எந்த மொழி கடவுளைக் கேள்வி கேட்கிறது என்பதை நூலாசிரியர் வலியுறுத்துகிறார்.தமிழ்தான் அந்த மொழி என்பதை சங்க இலக்கிய பாடல்களிலிருந்து ஆரோக்கியசாமி எடுத்துரைக்கிறார்.
கடவுளை கேள்விக்குள்ளாக்கும் மொழி என்பது மொழியும் கடவுளுக்கும் இடையே உருவாகும் சிக்கலான உறவை ஆராயும் புத்தகம். நம் சமூகம் பயன்படுத்தும் மொழி எப்படி கடவுள் பற்றிய நம்பிக்கைகளை கட்டமைக்கிறது, அல்லது சவால் செய்கிறது என்பதை ஆசிரியர் ஆழமாகப் பேசுகிறார்.
''கார் நறுங்கடம்பின் கண்ணி சூடி வேலன் வேண்ட லெரிமனை வந்தோய் கடவுள் ஆயினும் ஆக மடவை மன்ற வாழியே முருகா'' என்ற பாடலை முன்வைத்து சங்க இலக்கியத்தில் முருகனைப் பார்த்து மலைப் பெண்ணொருத்தி பாடுவதாக வரும் இப்பாடல் நீ பெரிய கடவுளானால் உனக்கு என்ன உரிமை இருக்கிறது? என்று அம்மலைப் பெண் முருகனிடம் கேட்பதாக பாடல் சொல்கிறது.தமிழ் தன்னியல்பாகவே கேள்வி மொழியாக காலந்தோறும் இருந்து வந்துள்ளதைப் பார்க்கலாம். இதுவே பாரதியின் பாடல்களில் விடுதலையின் மொழி. பெரியாரின் சொற்களில் அது பகுத்தறிவின் மொழி.இந்த தமிழ்தான் காலத்தால் முந்தியதும் காலத்தை செறித்து வருவதுமாகும்.
தங்களின் புனித நூல்களில் சொல்ப்படுகிற மந்திரங்கள் மூலம் தங்களால் கடவுள்களையே கட்டுப்படுத்த முடியும் என்று சொல்கிற விற்பனர்களும் சில மதங்களில் இருந்து வருகிறார்கள்.சமுதாயத்தில் முதன்மை இடத்தை தக்க வைத்துக் கொள்ள இவ்வாறாக கட்டமைக்கப்பட்ட பொய்கள் தேவையாகவுள்ளது.உடலுழைப்பில் இக் கூட்டம் என்றும் ஈடுபட்டதாக வரலாறு இல்லை.இவர்களே உருவாக்கி வைத்துள்ள புனைவுகள் கதைகள்,இவர்களின் செயல்களிற்குத் துணையானவையாக உள்ளன.இவைகள் எல்லாம் உண்மையென்று மக்களும் நம்புகிறார்கள் என்பது இன்னொரு கசப்பான உண்மையாகும்.
அரசுகள் உருவான காலத்தில் அவை தமது தேவைகளிற்காக மதங்களை தமது கட்டுப்பாட்டுக்குள் கொண்டு வந்தன.இது ஆட்சியாளர்களை கடவுளாக்கியது.மத பீடங்களுக்கு அரசனும் அரசனுக்கு மத பீடங்களும் தேவையாய் இருந்தன.வரலாறு நெடுக இவர்களின் கூட்டஇவர்களின் கூட்டணி வலுவானதாக இருந்துள்ளது.
இப்போது பதவிகள் ஆசைகள் அதைத்தக்க வைத்துக் கொள்ள மதம் தேவைப்படுகிறது.வலிமை படைத்த ஆட்சியாளர்கள் அரசு தமத மண்ணாசை பொன்னாசை பெண்ணாசையை நிறைவேற்றிக் கொள்ள அண்டை நாடுகள் மீது படையெடுத்தார்கள்.அப்போதெல்லாம் ஆட்சியாளர்களின் பக்கம் நின்று மத பீடங்கள் அரசுக்கு தணை புரிந்தன.இந்தப் படையெடுப்புக்கள் ஆக்கிரமிக்கப்பட்ட நாடுகளின் மதங்களையும் கடவுள்களையும் அழித்தன. படை நடத்தியவன் தமது மதங்களை கடவுளரை அவர்கள் மீது திணித்தான்.இது புதிய மதங்களை புதிய கடவுளரை உருவாக்கி கொள்ளவும் வழி செய்தன எனலாம்.
ஆரோக்கியசாமி ஒரு அத்தியாயம் முழுவதும் மார்க்ஸ் கம்யூசிசம் சோசலிசம் என்பவ பற்றி விரிவாக விளங்கப்படுத்தியுள்ளார்.ஆனால் இந்த அத்தியாயம் பெரிதாக என்னைக் கவரவில்லை.நன்றாக வாசித்துக் கொண்டிருக்கும் போது ஒரு தடை போன்று அமைகிறது இந்த அத்தியாயம்.சுவாரஸ்யமற்று நகர்கிறது.நூலாசிரியரும் ஒரு சோசலிசவாதியாக இருக்கலாம்.
உயிரினங்களின் பரிணாமத்தில் தொடங்கி மதங்களின் படைப்புக் கொள்கையை ஆராய்ந்து ஒவ்வாரு மதங்களிலிருந்தும் பரிணாமவியல் எவ்வாறு வேறுபடுகிறது என்பதை நூலாசிரியர் விளங்கப் படுத்துகிறார்.அடுத்ததாக அறிவியலை நோக்கிப் பயணிக்கிறது இந்தப் புத்தகம்.அதில் மதம் மதவெறியர்கள் விஞ்ஙானிகளையும் மூட நம்பிக்கைகளை எதிர்தோரையும் எவ்வாறெல்லாம் கொடுமைப்படுத்தி னார்கள் என்பதையும் அதையும் தாண்டி விஞ்ஞானம் எவ்வாறு வளர்ச்சியடைந்தது என்பதையும்,நூலகங்கள் மதவெறியர்களிட் சிக்கி என்னவானது என்பதையும் விரிவாகக் கூறுகிறார் ஆரோக்கியசாமி.இந்திய மதங்கள்,சங்கரரும் அத்வைதமும்,வைதீக எதிர்ப்பு மதங்கள்,மார்க்ஸ்,தமிழகச் சமயங்கள்,சமயமும் மனித வாழ்ககையும் என்று அத்தியாயங்கள் நீள்கிறன. இறுதி இரு அத்தியாயங்கள் முக்கியமானவை.நடப்பில் மதங்கள் என்னும் அத்தியாயத்தில் இன்றுள்ள முக்கியமான மதங்களும் அவற்றின் தற்கால நிலையையும் ஆராய்கிறார்.காணாமல் போக கடவுள்களும் மறைந்து போன மதங்களும் என்ற அத்தியாயத்தில் ஒரு காலத்தில் செல்வாக்கோடு திகழ்ந்து பின்னர் அழிக்கப்பட்டு இன்று அந்த மதங்களும் கடவுள்களும் இருந்த சுவடே தெரியாமல் போனவை பற்றி விரிவாக ஆராய்கிறார் ஆரோக்கியசாமி.
பொதுவான மதங்களில் இந்தக் காலத்திற்கு பொருத்தமில்லாதவைகள் எவையெனவும் எந்தக் காலத்திற்கும் எந்த மதமும் பொருத்தமில்லையெனவும் அழிந்து போன பழைய மதங்களினை பட்டியலை வைத்து நூலாசிரியர் நிறுவுகிறார்.இன்றைய மதங்கள் அழிந்து போன பழைய மதங்களிலிருந்து வேறுபட்டனவையல்ல என்பதையும் அவற்றிற்கு நேர்ந்த கதி இன்றைய மதங்களிற்கு நிச்சயம் வரும் எனவும் உறுதி படக் கூறுகிறார்.
வாசிக்கும் போது சுவாரஸ்யம் இருந்தாலும் இடையில் மார்க்சியம் கம்யூனிசம் சோசலிசம் என்று நீட்டி முழக்கி தொய்வை ஏற்படுத்துகிறார் ஆரோக்கியசாமி.அவைகளைத் தவிர்த்திருந்தால் நலம்.கம்யூனிசத்தை விளக்க அதிக பக்கங்கள் எடுத்துக் கொண்டது புத்தகத்தின் வேகத்தை குறைக்கிறது.
மொத்தத்தில் இந்தப் புத்தகமானது கடவுள் பற்றிய கட்டுக்கதைகளை உடைக்கும் கற்பனைகளைத் தகர்க்கும் நல்லதொரு புத்தகமாகும்.
Post a Comment